Rusia ka trupat në vend për të pushtuar Ukrainën “në çdo kohë” dhe qytetarët amerikanë duhet të largohen brenda 48 orëve të ardhshme, ka paralajmëruar SHBA.
Sipas BBC, përcjell Telegrafi, Shtëpia e Bardhë tha të premten se një pushtim mund të fillojë me bombardime ajrore që do të vështirësojnë nisjet dhe do të rrezikojnë civilët.
Një mori vendesh të tjera iu kanë kërkuar gjithashtu shtetasve të tyre të largohen nga Ukraina.
Rusia ka mohuar në mënyrë të përsëritur çdo plan për pushtimin e Ukrainës, pavarësisht se ka grumbulluar më shumë se 100 mijë trupa pranë kufirit.
Këshilltari i Sigurisë Kombëtare i SHBA-së, Jake Sullivan tha se forcat ruse tani janë “në një pozicion për të qenë në gjendje të ndërmarrin një aksion të madh ushtarak” dhe iu kërkoi qytetarëve amerikanë në Ukrainë që “të largohen sa më shpejt të jetë e mundur”, në vërejtjet që shihen si një përshkallëzim i qartë në urgjencën e paralajmërime nga zyrtarët amerikanë.
“Ne padyshim nuk mund të parashikojmë të ardhmen, nuk e dimë saktësisht se çfarë do të ndodhë, por rreziku tani është mjaft i lartë dhe kërcënimi tani është mjaft i menjëhershëm sa që [largimi] të jetë i kujdesshëm”, tha ai.
Sullivan shtoi se administrata nuk e din nëse presidenti rus Vladimir Putin kishte marrë një vendim përfundimtar për të pushtuar, por tha se Kremlini po kërkonte një pretekst për të justifikuar veprimet ushtarake, të cilat ai tha se mund të fillonin me bombardime intensive ajrore.
Më herët, Sekretari amerikan i Shtetit, Antony Blinken tha se forcat e reja ruse kishin mbërritur në kufi në atë që ai e përshkroi si “shenja shumë shqetësuese të përshkallëzimit rus”.
“Ne jemi në një dritare kur një pushtim mund të fillojë në çdo kohë, dhe për të qenë të qartë, kjo përfshin edhe gjatë Lojërave Olimpike [të cilat përfundojnë më 20 shkurt]”, tha Blinken, raporton Telegrafi, përcjell RTV Okarina.