Sipas njoftimeve të Institutit për Shëndetin Publik “Robert Koch” (RKI), sot Gjermania kapërceu pragun 40 mijë, me numrin e përgjithshëm të vdekjeve të shkaktuara nga COVID-19, ndërsa kancelarja Angela Merkel paralajmëroi se javët e ardhshme do të jenë faza më e vështirë e pandemisë.
“Javët e ardhshme do të jenë faza më e vështirë e pandemisë deri më tani”, tha ajo.
Gjermania, vendi më i populluar në Bashkimin Evropian, po përpiqet të përmbajë pandeminë.
Ajo u godit rëndë nga vala e dytë e virusit pasi u kursye relativisht, në krahasim me shumë vende të tjera evropiane, gjatë valës së parë.
Vendi sapo ka zgjatur dhe forcuar bllokimin e pjesshëm deri më 31 janar dhe po u kërkon qytetarëve të reduktojnë më tej kontaktet e tyre.
Më shumë se 5 000 pacientë me COVID-19 janë aktualisht në kujdes intensiv dhe më shumë se 80% e shtretërve në njësitë e kujdesit intensiv janë të zënë.
Sipas RKI, Gjermania ka regjistruar 465 vdekje nga COVID-19 në 24 orët e fundit, duke e çuar totalin që nga fillimi i pandemisë në 40 343.
Më shumë se 1,9 milionë janë infektuar deri më tani, me gati 17 000 raste të reja të regjistruara që nga e shtuna.
/RTV-Okarina/