Pas përplasjeve në degën e LDK-së në Malishëve, nesër do të mbahen zgjedhjet për kryetar të kësaj dege.
Kandidat për kryetar të kësaj dege është drejtori aktual i Administratës në këtë komunë, Fatmir Ademaj, i cili siç shihet ka mbështetjen e shumicës së delegatëve të kuvendit që mbahet nesër, shkruan RTV Okarina.
Postimi i plotë i tij:
“Të nderuar veteranë, aktivistë, dhe simpatizantë të LDK-së, dega në Malishevë.
Pas konsultimeve të fundit me strukturat e LDK-së në Malishevë, me nëndegë dhe delegatë, kam vendosur që unë Fatmir Ademaj të jem kandidat për kryetar të Lidhjes Demokratike të Kosovës, dega në Malishevë, në kuvendin zgjedhor që do të mbahet të dielën më datë: 24.07.2022.
Lidhja Demokratike e Kosovës është parti politike në kuptimin e plotë të fjalës. Ajo është shtëpia jonë e vetme politike. Dr. Ibrahim Rugova është udhërrëfyesi ynë për punë të ndershme, bashkëpunim dhe rezultate të mira.
Lidhja Demokratike e Kosovës, dega në Malishevë ka strukturë, djem dhe vajza që kanë vullnet, janë besnik, punojnë për LDK-në dhe janë të gatshëm të marrin përgjegjësi që të udhëheqin degën e LDK-së në Malishevë për 4 vitet e ardhshme.
Unifikimi, hapja e dyerve për të rinj dhe të reja, ndërtimi i një planprogrami të mirëfilltë, rikonsolidimi i nëndegëve, sidomos i nëndegëve ku nuk kemi pasur shtrirje do të jetë pikësynimi im.
Pra, shtëpia jonë politike duhet të ringritet, të përfaqësohet sërish me njerëz të ndershëm e punëtor, të dijshëm e kredibil.
Të dashur delegatë të LDK-së në Malishevë, kërkoj besimin tuaj për të udhëhequr me LDK-në në Malishevë.
Punën time si kryetar i LDK-së në Malishevë do ta kryej me nderë, përkushtim, angazhim maksimal dhe përgjegjësi të plotë.
Me respekt:
Fatmir Ademaj” /RTV Okarina/