Ballkani, Drenica dhe Drita vazhdojnë pa humbje këtë edicion

”BKT” Superliga e Kosovës ka zhvilluar dhe xhiron e tretë këtë sezon të ri të garave.

Ballkani, Drenica e Drita edhe këtë xhiro fituan ndeshjet e tyre.

Ballkani 3-2 Ulpiana

Ballkani ka fituar në frymën e fundit në Therandë.

Golin e parë për vendasit e realizoi Armend Thaqi, kurse Astrit Thaqi e dyfishoi rezultatin në të 53-tën. Por musafirët barazuan rezultatin me anë te Selimit dhe Shalës. Kur u mendua se ndeshja do të përfundonte në barazim në sken doli Rustem Hoxha i cili realizoi golin e fitores në minutën e dhjetë shtesë për fitoren 3-2.

Drenica 2-1 Prishtina

Drenica ka mposhtur kampionin në fuqi dhe rrugëton pa humbje në këtë edicion. Në stadiumin ”Bajram Aliu” ndeshja u dominua nga vendasit që me meritë morën pikët e plota.

Golin e parë e realizoi Denisson në minutën e 10-të, kurse Zabërgja e dyfishoi rezultatin në të 64-tën. Kurse për kryeqytetasit realizoi Oto John në të 73-tën.

Prishtina e ka bërë një nisje katastrofike të sezonit, kurse drenicasit po luajnë një futboll të bukur i cili po përkthehet edhe në rezultate pozitive.

Malisheva 0-1 Drita

Malisheva këtë fillim-sezoni po iu shkakton shumë probleme kundërshtarëve të vet, por Drita fitoi në fund të ndeshjes. Heroi i gjilanasve ishte sërish Ardit Tahiri i cili realizoi në minutën e 84-të.

Gjilani 0-0 Dukagjini

Ndeshja e vetme e kësaj xhiro e cila përfundoi pa gola ishte ajo ndërmjet Gjilanit dhe Dukagjinit.

Të dy skuadrat kishin mundësitë e tyre, por asnjëra nuk arriti t’i konkretizonte rastet e krijuara dhe kështu dy skuadrat ndajnë pikët.

Llapi 0-2 Feronikeli

Skuadra nga Drenasi mori një fitore komode në Podujevë duke mposhtur Llapin 2-0.

Golin e parë për musafirët e realizoi Dren Gashi në minutat shtesë të pjesës së parë, kurse golin e dytë e realizoi Diar Prokshi në të 64-tën duke e vulosur ndeshjen.