Administrata Tatimore e Kosovës, vazhdimisht është në përpjekje që të ofrojë lehtësi më të mëdha për tatimpaguesit. Së shpejti do të ofrojë edhe një shërbim të ri elektronik, ku përmes sistemit elektronik EDI do të mundësohet deklarimi i pasqyrave financiare, ashtu siç kërkohen me Ligjin për kontabilitet, raportim financiar dhe auditim.
Shërbimi i ri elektronik, më saktë deklarimi i pasqyrave financiare përmes sistemit elektronik EDI, do t’ju kursejë kohë të gjithë tatimpaguesve, duke u mundësuar që deklarimin e pasqyrave financiare ta bëjnë në mënyrë elektronike dhe vetëm në një vend, pra në ATK, ndërsa KKRF-ja, do të pajiset me informatat e tilla nga ATK-ja.
Obligues për të deklaruar pasqyrat financiare, janë të gjithë tatimpaguesit, ashtu siç janë të kategorizuar me Ligjin për kontabilitet, raportim financiar dhe auditim.
Pasqyrat financiare, për qëllime të ATK-së do të deklarohen në periudhën dhe afatin kur dorëzohet edhe deklarata vjetore për tatim në të ardhura personale- korporatave, pra nga 01 janari deri me 31 mars të vitit pasues për vitin paraprak.
Sa u përket të dhënave, se si duhet të plotësohen pasqyrat financiare, tatimpaguesit, do të kenë mundësinë që t’u referohen mostrave dhe udhëzuesve që do të publikohen në sistemin elektronik EDI, më saktë në menynë ku edhe do të paraqitet secila pasqyrë financiare veç e veç.
Për afatin e publikimit dhe mënyrën e deklarimit të pasqyrave financiare nëpërmjet sistemit elektronik EDI, do të njoftoheni me kohë.